Ijodkorlar marketingning yangi operatsion tizimiga aylanmoqda

So'nggi yillarda brendlar ijodkorlar bilan ishlashda ko'pincha bir xil xatoga yo'l qo'yardi: bir kunlik "viral" natija ortidan quvish, keyin esa hammasi unutilib ketishi. Adweek'ning Adspeak podkastida Omnicom Media Group'ning Creo agentligi prezidenti Kevin Blazaitis va Dentsu Shimoliy Amerika media amaliyoti bosh direktori Chrissie Hanson aynan shu muammoni ochib berdi — va nega endi bu yondashuv ishlamay qolganini tushuntirdi.

Hanson'ning ta'kidlashicha, zamonaviy ijodkor marketingi endi faqat qamrov (reach) yoki layklar sonini emas, balki auditoriya o'sishi, real "diqqat" darajasi va sotuvga bevosita ta'sirni (ROAS) o'lchashga qaratilishi kerak. Bitta viral video o'rniga brendlar endi ijodkor bilan uzoq muddatli, chuqur hamkorlik qurishga o'tishi lozim — bu esa ishonchni yo'qotmasdan haqiqiy ta'sirni yig'ish imkonini beradi.

Suhbatdoshlar keltirgan qiziq raqam: influencerlar tavsiya qilgan xaridlarning 42 foizi rejalashtirilmagan, ya'ni spontan tarzda sodir bo'ladi. Bu shuni ko'rsatadiki, ijodkorlar shunchaki mavjud talabni "kanalizatsiya" qilmaydi — ular butunlay yangi talab yaratadi, xaridorni hali o'zi bilmagan ehtiyoji tomon yetaklaydi.

Sun'iy intellekt haqida ham qiziq fikr bildirilgan: Hanson AI'ni ijodkorlik o'rnini bosuvchi vosita emas, balki auditoriyani sinash, kontent strategiyasini tezlashtirish va risklarni kamaytirish uchun yordamchi vosita sifatida ko'radi. Ya'ni AI g'oyani o'ylab topmaydi — u qaysi g'oya ishlashi mumkinligini oldindan taxmin qilishga yordam beradi.

Menimcha, bu yerdagi eng muhim fikr — kontentni algoritm atrofida emas, ijodkorning o'z ovozi va uslubi atrofida qurish kerakligi. Platformalar algoritmlarini deyarli har oy o'zgartiradi, lekin ijodkorning haqiqiyligi va auditoriya bilan aloqasi barqaror qoladi. O'zbekiston bozorida ham brendlar ko'pincha bir martalik reklama postiga pul sarflab, keyin natijasizlikdan hafsalasi pir bo'ladi — aslida muammo formatda emas, strategiyaning yo'qligida.