Pew tadqiqoti: internetdagi har 10 sahifadan bittasida sun'iy intellekt muallifligi izlari bor

Pew Research Center'ning Data Labs jamoasi deyarli yarim million veb-sahifani sun'iy intellekt aniqlagichi orqali tekshirib chiqdi va ularning taxminan 10 foizida SI muallifligi yoki tahriri izlarini aniqladi. ChatGPT ishga tushirilgandan keyin e'lon qilingan sahifalar orasida esa bu ko'rsatkich 35 foizgacha yetadi. Tadqiqot 20-avgust kuni e'lon qilindi — bu internetdagi SI matnlari ulushi bo'yicha so'nggi bir yil ichida chop etilgan uchinchi yirik baholash hisoblanadi.

Ma'lumotlar domenlar bo'yicha keskin farqni ko'rsatadi: .com domenlaridagi sahifalar .edu va .gov domenlariga qaraganda taxminan 10 baravar ko'proq SI muallifligi izlarini namoyon etadi. Olti oylik o'rtacha ko'rsatkichga ko'ra, bu raqam .com uchun 9,35 foiz, .org uchun 4,59 foiz, .edu uchun 1,03 foiz va .gov uchun atigi 0,76 foizni tashkil etadi. ChatGPT paydo bo'lishidan oldingi namunada barcha to'rtta domen turi 1 foiz atrofida yoki undan past bo'lgan — o'shandan beri ular keskin ajralib chiqqan, .com esa eng tez sur'atda o'sib bormoqda.

Pew, shuningdek, matnlardagi o'ziga xos "belgilar"ni ham kuzatdi: tire belgisining ishlatilishi 2023-yil boshidagi har 10 ming so'zga 5,79 martadan 2026-yil boshida 11,19 martaga oshgan, Oksford vergullari ishlatilishi esa 63 foizga ko'paygan. "Delve", "interplay", "testament" kabi SI yozuvida keng tarqalgan so'zlarning qo'llanilishi ikki baravardan ko'proq oshgan. Biroq Pew ta'kidlaganidek, bu belgilarning hech biri alohida bir hujjatni aniq belgilab bera olmaydi — inson mualliflari ham bu uslub va so'zlardan foydalanadi; gap katta matn massivlari bo'yicha nisbat haqida bormoqda.

Boshqa tadqiqotlar esa ancha yuqori raqamlarni keltiradi: SEO kompaniyasi Graphite hisob-kitobiga ko'ra, 2026-yilning birinchi choragida yangi chop etilgan ingliz tilidagi maqolalarning 49,9 foizi asosan sun'iy intellekt tomonidan yaratilgan. Imperial College London, Internet Archive va Stenford universiteti tomonidan tayyorlangan (hali taqrizdan o'tmagan) tadqiqot esa 2025-yil o'rtalariga kelib yangi yaratilgan veb-saytlarning 35 foizi SI tomonidan yaratilgan yoki unga tayanib yozilgan, degan xulosaga keladi.

Bu nima uchun muhim? SI matnlari izlari, birinchi navbatda, tijoriy internetda — ya'ni SEO mutaxassislari eng ko'p ishlaydigan qismda — jamlangan. Bundan tashqari, Pew'ning metodologiyasi inson yozgan, keyin SI vositasi bilan tahrir qilingan matnni ham xuddi boshidan oxirigacha SI yaratgan matn bilan bir toifaga kiritadi — bu esa Google Docs va Microsoft Word'da SI tahriri odatiy funksiyaga aylangan bugungi kunda farqni yanada xiralashtiradi. Oxir-oqibat, sahifa aniq, foydali va nashr qilishga arziydimi — buni hamon faqat uni o'qib chiqish orqali bilib bo'ladi.