Brendlar uchun obunachilar soni emas, mos kelish muhimroq — kreator marketing bo'yicha yangi tadqiqot

Kreator iqtisodiyoti 2027-yilga kelib deyarli yarim trillion dollarga yetishi kutilmoqda va marketing tizimining ajralmas qismiga aylandi. CreatorIQ'ning Influencers.club bilan hamkorlikda 100 dan ortiq mintaqadagi 5095 respondent ishtirokida o'tkazgan "Kreatorlar holati" tadqiqotiga ko'ra, kamida 500 ming obunachiga ega kreatorlarning 53 foizi auditoriya kutgan kontent bilan brend talablari o'rtasida ziddiyatni his qiladi.

Tadqiqot natijalariga ko'ra, brendlar kreator bilan hamkorlik qilishda birinchi navbatda "mos kelish"ni — kontent samaradorligidan ham yuqori — hisobga oladi. Obunachilar soni esa ro'yxatda eng pastki, sakkizinchi o'rinda turadi. Shunga qaramay, obunachilar soni Instagram, YouTube va TikTok'da daromadning eng kuchli ko'rsatkichi bo'lib qolmoqda — ya'ni brendlar bu mezonni ustuvor deb aytmasa-da, u to'lovni belgilashda hali ham katta ahamiyatga ega. "Biz endi hamma narsaga qarashimiz kerak bo'lgan davrda yashaymiz — jamoadagi mavqe, madaniy ta'sir, birinchi bitimdan tashqaridagi ta'sir", — deydi CreatorIQ mijozlar bo'yicha direktori Jennifer Cho.

Moliyaviy to'lov endi kreatorlarning brend bilan hamkorlikdan qoniqishining asosiy omiliga aylandi (35 foiz) — bu ko'rsatkich 2025-yildan buyon 16 foiz punktga o'sgan va o'sish imkoniyatlaridan ham ustun chiqdi (2025-yilda eng muhim omil aynan shu edi). Kreatorlarning aksariyati — 67 foizi — yiliga 10 ming dollardan kam ishlab topadi, 62 foizi uchun kontent yaratish asosiy daromad manbai emas. Faqat 1 foizi yiliga 250 ming dollardan ortiq daromad oladi. Kreatorlarning 53 foizi uchun brend hamkorligi yillik daromadining 25 foizdan kamini tashkil etadi.

Auditoriya bilan ziddiyat obunachilar soniga bog'liq: 500 ming obunachidan ortiq bo'lgan kreatorlarning atigi 17 foizi bu tarangligni sezmasligini aytadi, qolganlari esa sezadi. To'lov manbalari bo'yicha ham platforma tanlovi turlicha: yiliga 250 ming dollardan ortiq ishlaydigan kreatorlar Instagram'ni afzal ko'radi (60 foiz), TikTok'ni esa 30 foizi tanlaydi. Umumiy holda esa TikTok hamon "quyosh" o'rnida — kreatorlarning 52 foizi uni brendlashtirilgan kontent uchun asosiy platforma deb hisoblaydi (Instagram — 43 foiz), 48 foizi uni eng daromadli, 51 foizi esa eng samarali platforma deb ataydi. Shunga qaramay, barqaror biznes qurish salohiyati bo'yicha Instagram yetakchilik qiladi (38 foiz), undan keyin TikTok (35 foiz) va YouTube (23 foiz) keladi.

"Kreatorlar — bu o'z kichik biznesini yurituvchi jonli odamlar, — deydi Cho. — Bu yangi marketing kanalida siz shunchaki reklama yoki bitta ko'rsatkich bilan emas, aynan odamlar bilan ishlashingizni tushunish juda muhim."