X algoritmi qanday ishlaydi: repost "like"dan 40 barobar qimmat

X (sobiq Twitter) o'tgan hafta o'z lenta algoritmi qanday ishlashi haqida yangi tafsilotlarni e'lon qildi. Business Insider muxbiri Truman Dikersonning tahliliga ko'ra, platformaning Phoenix algoritmi har bir foydalanuvchiga uning oldingi xatti-harakatlariga asoslanib, u qaysi postlar bilan ko'proq o'zaro aloqa qilishini bashorat qilib ko'rsatadi.

X manba kodiga ko'ra, postning "og'irligi" quyidagicha hisoblanadi: post havolasini nusxalab ulashish (share) taxminan 20 ball beradi — bu "like" (yoqtirish)dan 40 barobar qimmat; ichki xabarlar orqali ulashish, javob va iqtibos qilish taxminan 5 balldan beriladi; obuna bo'lish 4 ball, ya'ni like'dan 8 barobar qimmatliroq baholanadi; "like"ning o'zi esa atigi 0,5 ball — bu eng past ko'rsatkichlardan biri.

Bu shuni anglatadiki, X aslida foydalanuvchilarni postni boshqa formatlarda qayta ulashishga (masalan, havolani nusxalab boshqa joyga joylashtirishga) rag'batlantirmoqda — post qamrovini oshirishning eng samarali yo'li aynan shu.

Salbiy tomondan, algoritm foydalanuvchilar shikoyat qilishi, ovozini o'chirishi yoki "qiziq emas" tugmasini bosishi mumkin bo'lgan postlarni jazolaydi — va bu jazo hatto foydalanuvchi postni blоklashidan ham kuchliroq. Biroq bu jazolar shaxsiylashtirilgan: ular faqat o'sha aniq foydalanuvchi uchun amal qiladi va postning umumiy qamroviga ta'sir qilmaydi.

Bu ma'lumotlar X'ning yondashuvida tub o'zgarish yo'qligini ko'rsatsa-da, brendlar uchun aniq strategik yo'nalish beradi: asosiy e'tibor auditoriyani chuqur o'rganishga — ular nimani ko'proq ulashishga moyilligini tushunishga qaratilishi kerak, chunki endi faqat like yoki obuna emas, balki ulashish (share) qamrovni oshirishning bosh omiliga aylanmoqda.