AQShning yirik kompaniyalarida moliya direktorlari rekord tezlikda almashmoqda
Kadrlar bo'yicha qidiruv kompaniyasi Crist Kolder Associates'ning yangi hisobotiga ko'ra, AQShning eng yirik ochiq kompaniyalarida moliya direktorlari (CFO) almashinuvi jadallashmoqda. Fortune 500 va S&P 500'ga kiruvchi jami 665 ta kompaniyani qamrab olgan tadqiqot shuni ko'rsatadiki, 2026-yil yakuniga qadar CFO almashinuvi 18,3 foizga yetishi kutilmoqda — bu 2020-yildagi 18,2 foizdan yuqori va so'nggi o'n yillikdagi 16 foizlik o'rtacha ko'rsatkichdan sezilarli darajada baland.
Crist Kolder'ning hammuassisi Skott U. Simmons buning sababini lavozim talablarining doimiy kengayib borishida ko'radi: ba'zi moliya direktorlari nafaqaga chiqishni tanlasa, boshqalari kompaniyani inqirozdan olib chiqish yoki sun'iy intellekt loyihalarini boshqarish uchun jalb etilmoqda.
Yilning birinchi yarmida bir qator yirik almashinuvlar ro'y berdi. AT&T'da 2021-yildan beri lavozimda bo'lgan Paskal Desroch dekabr oyi oxirida nafaqaga chiqishini e'lon qildi, uning o'rnini kompaniyada 20 yildan ortiq ishlagan Jennifer Biri egallaydi. Caterpillar'da CFO Endryu Bonfild sakkiz yillik faoliyatidan so'ng iste'foga chiqdi. Oracle sun'iy intellekt va bulutli infratuzilma bo'yicha kengayishga bog'liq strategik qadam sifatida Hilari Maksonni yangi moliya direktori etib tayinladi. Nike inqirozdan chiqish jarayonida Pfizer'dan Devid Dentonni jalb qildi, Pfizer esa o'z navbatida ichki va tashqi qidiruv o'tkazayotgan bir vaqtda vaqtinchalik CFO tayinladi.
Hisobotning yana bir muhim topilmasi — yangi tayinlangan moliya direktorlari yoshargan: 2026-yilda CFO'ning o'rtacha yoshi 48 ni tashkil etishi kutilmoqda, bu 2025-yildagi 52 yoshdan past. Simmons ta'kidlashicha, amaldagi CFO'ning o'rtacha ish staji atigi 4,5 yilni tashkil etadi, yangi tayinlanganlarning esa faqat taxminan 25 foizigina avval boshqa kompaniyada xuddi shu lavozimda ishlagan. "Bu ikki ko'rsatkichni birga olib qaralganda, kompaniyalar yoshroq va kamroq tajribaga ega bo'lgan iste'dodlarga murojaat qilishga majbur bo'layotgani ko'rinadi", — deydi u.
Tendensiya nafaqat moliya bo'limi uchun, balki butun kompaniya boshqaruvi uchun ham signal beradi: ustuvorliklar tezkor o'zgarayotgan sharoitda — sun'iy intellektga o'tish, inqirozni bartaraf etish yoki strategik yo'nalishni qayta ko'rib chiqishda — moliya rahbariyati barqarorligi endi avvalgidek kafolatlanmayapti.
O'xshash maqolalar
Kompaniya o'sgani sari nega mijozlar uni "tanimay qo'yadi"?
Kompaniya kichik jamoadan yuzlab xodimga o'sar ekan, boshida barcha qarorlarni birlashtirib turgan yagona mantiq asta-sekin yo'qoladi. Bu nomuvofiqlik mijozlarga qo'shimcha kuch, ziddiyatli signal va yo'qotilgan daromad sifatida qaytadi.
Glassdoor tadqiqoti: xodimlar rahbaridan aynan nimani kutishadi
Glassdoor'ning 150 mingdan ortiq sharhga asoslangan yangi tahliliga ko'ra, xodimlar rahbariyatda eng ko'p qadrlaydigan fazilat — karyera rivoji va nastavnichlik, eng ko'p shikoyat qilinadigan kamchilik esa — zaif kommunikatsiya va shaffoflik.
Sun'iy intellekt rahbarlarning mustaqil mulohaza qobiliyatini zaiflashtirmoqda
Garvard tadqiqotchilari 228 nafar baholovchi ishtirokida o'tkazgan tajriba sun'iy intellekt rahbarlarning mustaqil mulohaza qobiliyatiga qanday ta'sir qilishini ko'rsatdi.