Sun'iy intellekt poygasida kutilmagan lider: Alibaba Meta va Google'ni ortda qoldirdi

Xitoyning Alibaba Group Holding kompaniyasi o'zining ochiq modellar (kodi va vaznlari ommaga ochiq sun'iy intellekt modellari) oilasi — Qwen orqali sun'iy intellekt bozorida kutilmagan yutuqqa erishdi: so'nggi olti oyda ushbu modellar butun dunyo bo'yicha 3 milliarddan ortiq marta yuklab olindi. Bu ko'rsatkich bilan Qwen Meta Platforms, Google'ning bosh kompaniyasi Alphabet va Xitoydagi boshqa raqiblarni ortda qoldirib, dunyodagi eng ko'p yuklab olinadigan sun'iy intellekt modeliga aylandi.

Ochiq manbali sun'iy intellekt modellarini o'rganuvchi mashhur platforma Hugging Face'ning 14-avgustda e'lon qilingan hisobotiga ko'ra, Alibaba 460 dan ortiq modelni ochiq holda taqdim etgan, ularning ekotizimida esa 300 mingdan ziyod hosila (derivative) versiya paydo bo'lgan. Taqqoslash uchun: xuddi shu davrda Google 418 million, Meta esa 227 million marta yuklab olingan.

Ochiq modellarni dasturchilar o'z ehtiyojlariga moslab qayta sozlashi va ularning ustiga yangi mahsulotlar qurishi mumkin, shu sababli yuklab olishlar soni dasturchilar qaysi texnologiyaga ko'proq ishonch bildirayotganining ko'rsatkichiga aylangan. Bu esa, o'z navbatida, AQSh va Xitoy o'rtasidagi sun'iy intellekt raqobatida ta'sir darajasini o'lchaydigan mezonlardan biriga aylandi — chunki Xitoy ishlab chiquvchilari, jumladan Alibaba, nisbatan arzon va moslashuvchan modellarni faol targ'ib qilmoqda.

Qwen, shuningdek Moonshot AI va DeepSeek kabi Xitoy kompaniyalari OpenAI va Anthropic kabi AQShlik yopiq modellar bilan orani qisqartirishga urinmoqda. Chiplar va sun'iy intellekt tizimlariga qo'yilgan eksport cheklovlari — masalan, shu yozda Anthropicning Fable 5 modeliga xorijiy foydalanuvchilar uchun vaqtincha kirish taqiqlangani — Xitoy raqiblarining sur'atini pasaytirmayotganga o'xshaydi.

Hugging Face hisobotida ta'kidlanishicha, Qwen bo'yicha yuklab olish statistikasi uni "ochiq sun'iy intellekt ekotizimining eng yirik poydevorlaridan biriga" aylantirgan: "Qwen dasturchilar qaysi modelni moslashtirish va joriy etish haqida qaror qabul qilishda odatiy ish jarayonining bir qismiga aylandi", - deyilgan hujjatda. Keng model oilasi o'z-o'zini kuchaytiruvchi ekotizim yaratadi: ko'proq dasturchi modeldan foydalanadi, ko'proq hosila versiya yaratiladi, bu esa yangi foydalanuvchilarni jalb qiladi. Alibaba Qwen'ni o'z bulutli platformasi orqali Janubi-Sharqiy Osiyo va Afrikadagi korporativ mijozlarga ham yetkazib, ko'plab raqiblarida bo'lmagan qamrovga ega bo'ldi.

Bunga javoban AQShlik texnologiya gigantlari ham harakatga keldi: so'nggi haftalarda Meta va Nvidia dasturchilar o'rtasidagi raqobat kuchayishi fonida o'zlarining yangi ochiq sun'iy intellekt modellarini taqdim etishdi.