Yangi Zelandiya o'smirlar uchun ijtimoiy tarmoq cheklovini joriy etmoqchi

Yangi Zelandiya o'smirlar ijtimoiy tarmoqlardan foydalanishini cheklovchi navbatdagi davlatga aylanmoqchi. Bloomberg ma'lumotiga ko'ra, hukumatning yangi Onlayn Xavfsizlik qonun loyihasi Instagram, TikTok, Snapchat va Facebook kabi "yuqori xavfli" platformalarni foydalanuvchi 16 yoshdan katta ekanini tekshirish bo'yicha "asosli choralar" ko'rishga majbur qiladi. Biroq loyiha mamlakatdagi navbatdagi — noyabr oyidagi — saylovlardan keyingacha ilgari surilishi dargumon.

Yangi Zelandiya bu bilan Avstraliya boshlab bergan tendensiyaga qo'shilmoqda: dunyoning turli mintaqalarida hukumatlar o'smirlarni zararli kontentdan va ijtimoiy tarmoqqa haddan tashqari berilib ketishdan himoya qilish maqsadida shunga o'xshash cheklovlarni ko'rib chiqmoqda yoki joriy etmoqda.

Ammo Avstraliyaning o'zida olti oylik natijalar unchalik ishonarli emas. Mamlakat eSafety komissari e'lon qilgan hisobotga ko'ra: voyaga yetmagan o'smirlarning aksariyati hamon ijtimoiy ilovalardan foydalanmoqda; muammoli onlayn xulq-atvor yoki o'smirlar farovonligida sezilarli o'zgarish qayd etilmagan; ijtimoiy tarmoqdan foydalanishni kamaytirgan o'smirlar esa buning o'rniga messenjer va onlayn o'yinlarga ko'proq vaqt sarflay boshlagan.

Bu natijalar platformalarning o'nlab minglab hisoblarni o'chirishiga qaramay qayd etilgan — Meta so'nggi paytda Avstraliyada 750 ming voyaga yetmagan foydalanuvchi hisobini o'chirganini ma'lum qilgan edi. Muammoning bir qismi yosh tekshiruvi tizimida: ko'pchilik o'smir shunchaki tug'ilgan sanasini kattaroq qilib ko'rsatib, tekshiruvdan osongina o'tib olmoqda.

Bu esa marketolog va brendlar uchun muhim signal: o'smirlarni platformadan butunlay chetlatish ularni ijtimoiylashuvdan to'xtatmaydi, aksincha, kamroq nazorat qilinadigan, "chekka" platformalarga surib yuborishi mumkin — bu esa auditoriya bilan ishlash strategiyasini yana ham murakkablashtiradi.