Selena Gomezning ruhiy salomatlik startapi sarmoyadorlar sudiga tortildi

Amerikalik aktrisa va qo'shiqchi Selena Gomez 2021-yilda onasi Mandi Tifi va biznes hamkori Daniella Pirson bilan birga "dunyodagi birinchi ruhiy salomatlik ekotizimi"ni yaratish maqsadida Wondermind startapini ishga tushirgan edi. Biroq besh yildan so'ng loyiha uning shaxsiy bosh og'rig'iga aylandi: payshanba kuni sudga topshirilgan federal da'vo arizasida investorlar kompaniyada nima noto'g'ri ketgani haqida batafsil bayonot berishdi — ular hech qachon yaratilmagan ilova va, ularning so'zlariga ko'ra, aslida mavjud bo'lmagan yirik korporativ hamkorliklar haqida gapirishmoqda.

Da'vo arizasida Gomez, uning hammuassislari va Wondermind investorlarni aldashda ayblanmoqda. Investorlar orasida Bausch + Lomb bosh direktori va Allerganning sobiq rahbari Brent Saunders hamda tadbirkor, ko'chmas mulk investori Mark Roberts ham bor. "Da'vogarlar Wondermind Global Inc.'ga qariyb 1,2 million dollar sarmoya kiritdi, chunki ayblanuvchilar kompaniyada foydali va o'ziga xos ruhiy salomatlik platformasini ishga tushirish uchun zarur infratuzilma, rahbariyat va resurslar mavjudligini soxta tarzda taqdim etishgan", - deyilgan arizada.

Investorlarning ta'kidlashicha, hammuassislar kompaniyaning biznes va o'sish rejalarining muhim jihatlarini ham noto'g'ri talqin qilishgan: dunyoga mashhur aktrisa va qo'shiqchi Gomez kompaniyada marketing bo'limi rahbari sifatida faol rol o'ynashi; Pirson JPMorgan va Fidelity kabi kompaniyalar bilan hamkorlik shartnomalarini imzolagani; daromad keltiruvchi loyihalar allaqachon ishga tushirilgani haqidagi da'volar — bularning barchasi haqiqatga to'g'ri kelmagan, deyishadi investorlar. "Hamkorliklar mavjud bo'lmagan. Loyihalar hech qachon amalga oshmagan. Ilova hech qachon yaratilmagan. Va uch yil davomida, kompaniya sekin-asta qulab borayotgan bir paytda, uning asoschilari, mansabdor shaxslari yoki direktorlaridan birortasi ham investorlarga bir og'iz so'z aytmagan", - deyilgan da'vo arizasida.

Gomez, Tifi va Pirson Business Insiderning sharh so'roviga javob berishmadi. Gomezning advokati People nashriga bergan izohida unga qarshi ayblovlarni "asossiz" deb atadi: "Selena Gomezning har qanday firibgarlik yoki boshqa noqonuniy xatti-harakatlarda qatnashgani haqidagi da'volar dalilsiz va huquqiy jihatdan noto'g'ri", - dedi advokat Metyu Rozengart. Pirsonning vakili esa USA Today'ga bergan bayonotida u ayblovlarni qat'iyan rad etishini, hech qachon investorlar mablag'ini shaxsiy maqsadlarda ishlatmaganini, aksincha, o'z shaxsiy mablag'ini biznesga kiritganini va kompaniyadan maosh olmaganini bildirdi.

Investorlarning aytishicha, ular kompaniyadagi muammolardan 2025-yil sentyabr oyida The Cut nashri Wondermind haqida maqola chop etmaguncha bexabar bo'lib qolishgan. O'sha maqolada startap 2021-yilda ishga tushganidan ko'p o'tmay boshlangan boshqaruv muammolari yoritilgan edi: o'sha davrda Tifi va Pirson bosh direktorlar bo'lgan, Gomez esa "ta'sir bo'yicha direktor" lavozimini egallagan. Xodimlarning aytishicha, Los-Anjelesdagi ofisga rahbarlik qilgan Tifining boshqaruv uslubi beqaror bo'lib, u Nyu-York ofisiga rahbarlik qilgan Pirson bilan ziddiyatga kelgan; Pirson 2023-yilda shu keskinlik fonida kompaniyani tark etgan, Gomez esa Tifi bilan kelishmovchilik sababli startapdan uzoqlashgan.

Bu voqea mashhur ism bilan bog'liq startaplarning nechog'li tavakkalli bo'lishi mumkinligini yana bir bor eslatadi: mashhur asoschining nomi sarmoyadorlarni jalb qilishi mumkin, biroq bu operatsion shaffoflik va real natijalarning o'rnini bosolmaydi.